Franz Joseph I.

→ Der Artikl is im Dialekt: „Steirisch“ gschriem worn.

Da Franz Joseph I. (* 18. August 1830 aufn Schloss Scheenbrunn; † 21. Novemba 1916 a duat), vuinaumantlich Franz Joseph Karl von Habsburg-Lothringen, woa fam 2. dezember 1848 bis dassa gstoam is Kaiser fa Östarreich, Apostolischa Kini fa Ungarn und Kini fa Behmen.

Noch da Revolution im Kaisertum Östarreich 1948 woa sei Onkl, da bisherige Kaiser Ferdinand I. laut da Dynastie zschwoch, dassa weita regiert. In Franz Joseph sei Voda, da Franz Karl von Österreich hot a net weidamochn wuin, also hot da Franz Joseph mit nur 18 Joa die Nochfuige autretn.

Zerscht hota ziemli obsolutistisch und zentralistisch regiert, owa nochdem dass im Sardinischn Kriag 1859 und im Deitsch-Deitschn Kriag 1866 so wüd umgaungan is, hota 1867 es Reich zur Dopplmonarchie Österreich-Ungarn umwaundln miaßn. Die Spaunnungan im Vüveikastoot san hoit imma mehr woan, bis 1914, wias in Thronfuiga Franz Ferdinand hamdraht haum, da Hehepunkt arreicht woan is. In Kaiser sei Kriagsaklärung auf Serbien hot si daun letztendlich zan Easchtn Wötkriag entwicklt.

Vaheirat woara mit da Sisi, bis dass sie 1898 gewoitsaum gstoam is. Weil erna Bua, da Kronprinz Rudolf, 1889 fa sich söba aus as Zeitliche gsegnat hot, is die Thronfuige aufn Franz Joseph sein Bruada, in Koarl Ludwig, iwagaungan.

Wia da Franz Joseph daun söba am 21. November 1916 in die Ewigkeit vuarausgaungan is, is sei Großneffe da Koarl Kaiser woan, der daun in Kriag valuan hot und unter dem daun die Monarchie aufgaungan is.